Охрид повторно ќе биде центарот на македонската народна музика, традиција и култура. На 22 јули 2026 година, во срцето на бисерот на Македонија, на градскиот кеј кај хотелот „Палас“, ќе се одржи јубилејното шесто издание на музичкото шоу „Имат Немат“, кое годинава прераснува во голем Етно Фест посветен исклучиво на македонската народна песна и вековната традиција.
Настанот веќе шест години успешно ја негува и промовира македонската музичка ризница, а ова јубилејно издание ќе биде посебно по својата концепција и порака – зачувување на автентичната македонска песна како едно од највредните обележја на националниот идентитет.
Организаторите упатуваат јавен повик до сите заинтересирани изведувачи кои сакаат да бидат дел од фестивалот задолжително внимателно да го прочитаат правилникот и условите за учество. Годинава на сцената ќе се изведуваат исклучиво македонски народни, етно и староградски песни, со што фестивалот останува доследен на својата мисија – афирмација на македонското музичко наследство.
Публиката ќе има ретка можност да ужива во најубавите македонски мелодии, песни кои со генерации се пренесуваат од колено на колено и претставуваат жив сведок на историјата, традицијата и духот на македонскиот народ. Звуците на народните инструменти, препознатливите македонски ритми и емоциите вткаени во секоја песна ќе создадат вистинска фестивалска магија покрај охридското крајбрежје.
На сцената се очекува настап на повеќе од 20 изведувачи од Македонија и од македонската дијаспора, кои преку своите интерпретации ќе испратат силна порака за единство, љубов кон татковината и почит кон богатото културно наследство. Во екот на туристичката сезона, илјадници посетители од земјата и странство ќе имаат можност одблизу да ја почувствуваат убавината на македонската песна и фолклор.
Во изминатите шест години, музичкото шоу „Имат Немат“ изгради препознатлив бренд кој успешно ги поврзува музиката, традицијата и македонските вредности. Од локален музички проект, шоуто прерасна во значајна културна манифестација која секоја година привлекува сè поголемо внимание од јавноста и љубителите на народната музика.
Јубилејното издание ветува вечер исполнета со емоции, патриотски дух, автентични изведби и незаборавна атмосфера. На 22 јули, охридскиот кеј ќе се претвори во голема отворена сцена на која ќе одекнуваат песните што ја раскажуваат приказната за Македонија, нејзината историја, традиција и душа.
Сите патишта ова лето водат кон Охрид – градот кој уште еднаш ќе покаже дека македонската песна живее, се негува и гордо се пренесува на новите генерации.
ЕТНО ФЕСТ „ИМАТ НЕМАТ“ – ФЕСТИВАЛ НА МАКЕДОНСКАТА ПЕСНА, ТРАДИЦИЈА И ДУША!
