Во градот на песната – Валандово, на 26 и 27 мај ќе се одржи 39-тото издание на првиот, единствениот и еден од најпрепознатливите македонски музички фестивали – „Фолк Фест Валандово 2026“.
Фестивалот и оваа година носи две незаборавни вечери исполнети со емоции, македонска песна, нови хитови и настапи на големи музички имиња.
На 26 мај, на градскиот плоштад во Валандово, ќе се одржи првата предфестивалска вечер – вечер посветена на духот на македонската песна, носталгијата и најголемите валандовски хитови кои оставиле траен белег во музичката историја.
Публиката ќе има можност повторно да ужива во безвременските песни испеани од врвни македонски изведувачи како што се Блага Петреска, Елена Велеска, Кате и Соната, Кристијан Кико Болеро, Мишко Крстевски и Марјан Коцев, додека свој мини концерт ќе одржи и Влатко Младиновски.
Оваа прва фестивалска вечер ќе биде емитувана и на националната телевизија МРТ, овозможувајќи атмосферата од Валандово да стигне до домовите низ целата држава, но и до македонската публика ширум светот.
На 27 мај, во фестивалската сала „Јанко Узунов“, ќе следува главната фестивалска вечер, кога ќе бидат претставени 20 нови композиции – идни потенцијални хитови на македонската фолк сцена.
Новите песни ќе ги изведат добро познати музички имиња, но и млади музички надежи кои допрва ќе го градат својот пат на македонската музичка сцена.
Меѓу учесниците годинава ќе настапат: Блага Петреска, која свечено ќе ја добие наградата за животно дело, Нино Величковски, Кристијан Божинов, Ивана Серафимовска, Дејан Николоски – Чуле, Мишко Крстевски, Благоја Грујовски, Даце Николовски, Лени Партикова, Горан Тодоровски, Благица Калева, Распеани Валандовчани и многу други.
Втората фестивалска вечер ќе биде пренесувана во живо на МРТ, со што љубителите на македонската народна музика ќе можат во живо да ја следат магијата од Валандово.
Организатор на „Фолк Фест Валандово 2026“ е Општина Валандово, која и оваа година продолжува да ја негува богатата традиција на фестивалот што речиси четири децении претставува симбол на македонската песна, култура, емоција и музичко наследство.
Валандово повторно ќе биде центарот на македонската фолк музика – место каде што се создаваат хитови, се слави традицијата и се пишува нова музичка историја.
