БУГАРИЈА И ГРЦИЈА ДА ГО ПРИЗНААТ МАКЕДОНСКОТО МАЛЦИНСТВО!

На Балканот, „македонското малцинство“ е признаено од Република Србија и Република Албанија, наши соседни држави, но не е признаено од другите наши соседи, Република Бугарија и Република Грција.
Посебноста на Македонците во административниот регион Македонија, Република Грција, се потврдува со регистрирање на македонската политичка партија. Тоа е политичката партија Виножито, со седиште вo Лерин (Флорина) во 1994 година. Првиот конгрес на оваа партија е одржан на 30 мај 2004 година во Солун (Тесалоники). Во Лерин (Флорина) организира отворање на „Македонска куќа“. Со други македонски организации ги печати двојазичните списанија на македонски и грчки јазик: „Меглена“, „Зора“, „Нова Зора“ и „Лоза“. Амблемот на партијата Виножито е напишан на грчки, македонски и англиски јазик. Виножито симболично означува демократски мост на пријателство помеѓу Македонците и Грците во грчкото општество. Виножито е стремеж и надеж на Македонците лојални граѓани на грчката држава.
Сегашноста дава можност „македонското малцинство“ да се признае од нашиот јужен сосед Република Грција. Денес ние, Македонците со чест и достоинство потписници на пораката, бараме да се признае „македонското малцинство“ во залог на нашата заедничка демократска иднина и напредок на Балканот, кој е составен дел на Европа.
Патот е заеднички трасиран со Повелбата од Сан Франциско (1945 г.) и Универзалната декларација за човекови права од Њујорк (1948 г.), донесена од Организацијата на Обединетите нации, и со Европската конвенција за заштита на човековите права и слободи, донесена во Рим (1950 г.) од Советот на Европа.
Се надеваме дека со гестот на добра волја од наша страна за меѓусебно разбирање, градиме иднина на пријателство на нашите народи!

Извор:Нова Македонија