Македонски Брод на 29 јули ќе биде во знакот на музиката, спомените и хуманоста. Една од најпрепознатливите музички групи од Порече – „КАЛЕ“, оваа година одбележува голем јубилеј – 45 години постоење и непрекинато музицирање, а по тој повод ќе приреди спектакуларен концерт кој ветува незаборавна вечер исполнета со најголемите хитови, врвни гости и благородна мисија.
Концертот ќе се одржи на 29 јули (вторник) со почеток во 21:00 часот, на отворената сцена – ракометното игралиште во Гимназијата во Македонски Брод, каде се очекува да се соберат љубители на македонската музика од целиот регион.
Посебна тежина на овој јубилеј ќе му дадат специјалните гости – легендарниот Наум Петрески и познатата интерпретаторка Зуица Лазова, кои заедно со членовите на групата „КАЛЕ“ ќе приредат вечер исполнета со македонска песна, емоции и незаборавни музички моменти. На сцената ќе им се придружат и вокалните солисти од Македонски Брод – Кристијан Крстески, Даниел Крстески и Жарко Стојкоски, кои дополнително ќе ја збогатат концертната програма.
Публиката ќе има можност повторно да ги запее безвременските хитови кои оставија длабока трага во македонската музика, меѓу кои „Гордо наше Порече“, „Димитриче русокосо девојче“, „Заборавиме“, „Спомени“ и многу други песни што со децении ги обединуваат генерациите.
Но, овој концерт носи и уште поголема вредност. Целиот приход од продадените влезници, кои чинат само 150 денари, ќе биде дониран во хуманитарни цели, со што јубилејната прослава ќе добие и силна хумана димензија. Така, секој купен билет ќе биде не само поддршка за македонската музика, туку и помош за оние на кои таа им е најпотребна.
Организаторите упатуваат покана до сите љубители на добрата музика да бидат дел од оваа историска вечер, да ги оживеат спомените, заедно да ги испеат најголемите хитови на групата „КАЛЕ“ и да покажат дека музиката има моќ да обединува и да прави добри дела.
📍 Македонски Брод
📅 29 јули
🕘 Почеток: 21:00 часот
📌 Ракометно игралиште – Гимназија Македонски Брод
🎟️ Цена на билет: 150 денари (целокупниот приход е наменет за хуманитарни цели)
Информации и билети:
📞 078-241-507
📞 078-241-508
📞 070-702-585
