Традиционално, на 13 и 14 јануари, по повод Стара Нова година – Василица, во село Куратица, Охридско, се одржува една од најавтентичните народни манифестации во Македонија – Василичарските прослави, познати и како Курајчи карневал.
На 13 јануари, според стариот обичај, вечерта се оди по сите куќи низ селото. Василичарите, со маски, песни и ора, ја носат празничната радост, а неизоставен дел од традицијата се зетот и невестата, симболи на бериќет, среќа и нов почеток.
Главната, централна прослава се одржува на 14 јануари, на сред село, каде Куратица пулсира во ритамот на традицијата. Програмата вклучува жива музика, избор на најдобрите маски, многу смеа и заедничко дружење.
За сите присутни има топла ракија, вино и традиционални специјалитети, со што домаќините уште еднаш ја покажуваат прочуената курајчка гостопримливост.
Годинава, за одличната атмосфера ќе се погрижи Благојче Стојановски – Туше со својот бенд, додека Стојан Стојановски е задолжен за директниот пренос. Курајчи карневалот ќе се емитува во живо на социјалните мрежи и на сателитската телевизија ИНТВ, овозможувајќи им на Македонците ширум светот да бидат дел од оваа уникатна прослава.
Курајчи карневалот е повеќе од обична прослава – тоа е жив доказ дека македонската традиција, обичај и идентитет се чуваат и се пренесуваат од генерација на генерација.
Leave a Reply