Полицијата уапси патник кој држеше возач на автобус како заложник на автопат во јужна Германија, пренесува Ројтерс и локалните медиуми, кои се повикуваат на полицијата. Агенцијата Танјуг објави дека биле нападнати патници и возачи на меѓународната автобуска линија Дортмунд-Белград на српскиот превозник „Ласта“.
Ројтерс пренесува дека околу 21.25 часот се слушнале три детонации и дека на терен се силни полициски сили и хеликоптери.
Во автобусот досега не е пронајдено оружје, но полицијата ја продолжува потрагата.
Автопатот А9 помеѓу Хилполштајн и Грединг беше затворен во двата правци, но полицијата објави дека сообраќајот ќе биде пуштен наскоро.
Полицијата претходно објави на Твитер дека се претпоставува дека во автобусот имало вооружен маж и уште неколку лица, како и дека патниците успеале да го напуштат возилото.
