Македонскиот спорт испиша нова златна страница! Најдобрата македонска тенисерка Лина Ѓорческа направи подвиг за паметење и стана првата Македонка во историјата што ќе настапи на најпрестижниот тениски турнир во светот – Вимблдон!
Со победата над Италијанката Лусија Бронцети, Ѓорческа го оствари својот детски сон, но и сонот на цела спортска Македонија. Нејзиниот успех добива уште поголема тежина ако се знае дека во сите три квалификациски кола таа влезе како аутсајдер, против тенисерки подобро рангирани од неа на светската ВТА-листа.
Но, кога се игра со срце, желба и македонски инает – невозможните работи стануваат реалност.
Лина покажа неверојатна ментална сила, голема борбеност и карактер на вистински шампион. Од меч во меч, таа ги рушеше прогнозите и ги замолчуваше сите сомнежи, обезбедувајќи место меѓу најдобрите светски тенисерки на легендарната трева во Лондон.
Овој историски успех е круна на долгогодишната работа, жртва и посветеност на македонската тенисерка, која со години достоинствено го носи македонското знаме на меѓународната сцена.
Пред неа сега е нов огромен предизвик. Во првото коло на главниот турнир, Ѓорческа ќе се соочи со Американката Аманда Анисимова, која моментално се наоѓа на високото шесто место на светската ВТА-листа и важи за една од фаворитките на турнирот.
Без разлика на исходот од натпреварот, Лина веќе го постигна најголемиот успех во историјата на македонскиот женски тенис. Нејзиното име засекогаш ќе биде запишано со златни букви како првата Македонка што зачекорила на терените на славниот Вимблдон.
Нејзиниот подвиг е инспирација за сите млади спортисти во Македонија – доказ дека со многу труд, упорност и верба во себе, дури и најголемите соништа можат да станат реалност.
Браво, Лина! Цела Македонија е горда на тебе и ќе навива со едно срце на најголемата тениска сцена во светот! 🇲🇰
