Економистите сметаат дека ниту ограничените маржи, како и замрзнатите цени не можат да го запрат глобалниот раст на цените на храната. Според нив, војната во Украина уште повеќе ќе ја поттикне инфлацијата и ќе предизвика дополнителен раст на цените за околу 4 отсто од јануари до мај. Од опозициската ВМРО-ДПМНЕ предлагаат сет мерки за справување со инфлацијата и заштита на стандардот на граѓаните. Бараат да не се плаќа данок за увоз и промет на прехранбени производи и на топлинска енергија, продолжување на важноста на даночната стапка за електрична енергија од 5 отсто по 1 јули, како и намалување на акцизата за нафта и нафтени деривати за 50 отсто
Од утре наместо замрзнати цени на основните прехранбени производи на сила стапува одлуката за ограничување на трговските маржи. Со оваа одлука заработувачката на трговците на мало се ограничува на 10 проценти, а на оние на големо на 5 отсто. Граѓаните се свесни дека ги очекуваат нови повисоки цени во маркетите и не веруваат дека замрзнатите маржи ќе ја намалат инфлацијата. Поради тоа тие викендов ги празнеа рафтовите со брашно, млеко, масло за јадење, ориз, тестенини… кои сметаат дека ќе поскапат. Ова претходно го најавија и производителите, бидејќи како што велат освен цените на енергенсите поради војната во Украина има драстичен раст на цените на суровините пченката, пченицата, сојата…
