Македонската песна, македонското оро и македонската традиција уште еднаш покажаа дека немаат граници. Илјадници километри далеку од Македонија, во Волонгонг, Австралија, македонскиот дух живее силно и гордо, а доказ за тоа беше и големата македонска игранка во организација на МКУД „Македонски Бисери“.
По подолга пауза, македонската заедница повторно се собра на едно место, во вечер исполнета со песна, ора, дружење, пријателство и неизмерна љубов кон татковината. Над 500 гости беа дел од оваа прекрасна македонска вечер, која ќе остане запаметена како уште една потврда дека Македонија се носи во срцето, без разлика каде живееме.
Од најмладите играорци до највозрасните членови на македонската заедница, сите заедно ја исполнија вечерта со посебна енергија. Македонскиот збор, македонската музика и традиционалните ора ја создадоа атмосферата која ги потсети сите присутни на родниот крај, на македонските села и градови, на празниците, соборите и семејните собирања.
Како што беше истакнато од раководството на МКУД „Македонски Бисери“, ваквите средби се многу повеќе од обична забава. Тие се начин македонската заедница во Австралија да ја зачува својата култура, јазик, традиција и национален идентитет и истото наследство да им го пренесе на најмладите генерации.
Посебна чест и задоволство беше присуството на бројни гости и претставници на македонската заедница, како и претставници на австралиските институции кои ја поддржуваат работата и активностите на македонската заедница.
Од страна на организаторите беше упатена благодарност до Federal Member for Cunningham, Ms Alison Byrnes MP, како и до NSW Minister for Planning and Public Spaces и State Member for Wollongong, The Honourable Paul Scully MP, за нивната поддршка.
Посебно добредојде беше упатено и до парохискиот свештеник од Македонската православна црква „Св. Климент Охридски“ во Порт Кембла, поп Раде, и неговата сопруга Гордана Јосевски, како и до новиот парохиски свештеник од манастирот „Св. Петка“ во Кембла Гранџ, поп Кристијан, и неговата сопруга Ангела, со топли зборови за добредојде во Австралија.
Оваа вечер беше уште еден пример за силата на македонското единство и пријателство во Австралија. На свеченоста присуствуваа и бројни македонски културно-уметнички друштва, кои со своето присуство дадоа дополнителна вредност и убавина на големиот македонски собир.
Организаторите упатија благодарност до МКУД „Јане Сандански“ од Мелбурн, со порака дека пријателството меѓу македонските друштва треба да трае засекогаш.
Топло добредојде беше упатено и до МКУД „Разиграна Македонска“ од Кебејан, со благодарност за нивното присуство и за придонесот во зачувувањето на македонската традиција.
Со посебна радост беа поздравени и членовите на МКУД „Илинден“ од Западен Сиднеј, со желба ваквите македонски средби секогаш да бидат уште повесели, побројни и попријателски.
На свеченоста присуствуваше и МКУД „Македонка“, на кое му беше упатена благодарност за повторното заедничко дружење и за поддршката на македонските културни активности.
Сите овие друштва, заедно со „Македонски Бисери“, се дел од една голема македонска приказна која се создава илјадници километри далеку од татковината.
Македонската традиција не се чува само со зборови — таа се чува со песна, со оро, со македонскиот јазик, со македонските носии и со љубовта што се пренесува од генерација на генерација.
Токму затоа работата на македонските културно-уметнички друштва во Австралија има огромно значење. Денешните најмлади играорци се идните носители на македонската култура. Преку нив Македонија продолжува да живее и во новите генерации родени далеку од својата историска татковина.
Од МКУД „Македонски Бисери“ беше упатена искрена благодарност до сите членови на Управата, до играорците, кореографите, организаторите, волонтерите, помошниците и спонзорите кои со својата посветеност придонесоа оваа вечер да биде успешно реализирана.
На крајот, најголемата благодарност беше упатена до сите присутни гости кои ја исполнија салата и покажаа дека македонската заедница во Австралија е жива, активна и обединета.
Оваа вечер уште еднаш испрати силна порака:
КАДЕ И ДА СМЕ, МАКЕДОНИЈА Е ВО НАС.
Од Волонгонг до Мелбурн, од Сиднеј до секое место каде што живеат Македонци, македонската песна и оро продолжуваат да се слушаат и да се играат.
И додека се веат македонските знамиња, се носат македонските носии и се пеат македонските песни, нашата традиција продолжува да живее.
Да живее македонската песна!
Да живее македонското оро!
Да живее македонската култура и традиција!
И нека трае македонското единство каде и да живеат Македонците ширум светот!
