Европската Унија и Австралија постигнаа историски договор за слободна трговија, со што се отвора ново поглавје во економската и политичката соработка меѓу двете страни.
Договорот беше официјално потврден од претседателката на Европската комисија, Урсула фон дер Лајен, и австралискиот премиер Ентони Албанезе, по преговори кои траеја цели осум години.
Главната цел на договорот е целосно укинување на царините и трговските бариери, што ќе овозможи значително зголемување на размената на стоки и услуги, како и нови можности за бизнисите од двете страни.
Овој чекор е дел од пошироката стратегија на Брисел за диверзификација на трговските партнери, особено во време на засилени глобални тензии – вклучително и односите со Кина и САД.
Воедно, договорот ја потврдува сè поголемата ориентација на Европа кон Индо-пацифичкиот регион, надоврзувајќи се на слични договори со други земји во тој дел од светот.
– „Денес испишуваме историја во свет кој брзо се менува. Отворената и фер трговија, базирана на правила, е клучот за стабилност и доверба,“ изјави фон дер Лајен.
Покрај економскиот аспект, беше претставено и ново стратешко партнерство во областа на безбедноста и одбраната. Соработката ќе опфати развој на одбранбената индустрија, кибер-безбедност, борба против тероризам, како и заеднички одговор на современите хибридни закани.
За договорот да стапи во сила, потребно е одобрување од земјите-членки на ЕУ, Европскиот парламент и Парламентот на Австралија.
