Македонија добива нов спортски херој – и тоа на само 10 години! Павел Митев, момче родено во Скопје, а израснато во Англија, веќе сериозно го тресе светот на бразилското џиу-џицу, освојувајќи медали и шампионски појаси додека гордо го носи македонското знаме.
Иако живее далеку од татковината, Павел не ја заборава својата земја. Напротив – на секој настап ја претставува Македонија со гордост, покажувајќи дека талентот, дисциплината и љубовта кон корените немаат граници.
Со тренинзи започнал на само шест години под водство на тренерот Ренато Таруло, а уште како дете станал еден од најистакнатите натпреварувачи во својата категорија – често надминувајќи и многу повозрасни противници. Неговиот успех не е случаен: зад него стојат часови напорна работа, железна дисциплина и огромна поддршка од семејството.
Неговата колекција на трофеи веќе е импресивна – бронза, сребро и злато од престижни турнири организирани од IBJJF, што го става меѓу најперспективните млади борци во Европа.
Но, тука не застанува. На последниот турнир НАГА (14 март 2026), Павел блесна со нов подвиг – освои шампионски појас во НоГи категоријата и сребрен медал во Ги, потврдувајќи дека е име за кое допрва ќе се зборува.
Во неговиот пат не е сам – до него е и неговата сестра Дафина, која исто така реди успеси и медали, правејќи го ова семејство вистинска спортска приказна за восхит.
Според стручњаците, пред Павел е блескава иднина и кариера што може да го однесе до врвот на светските боречки сцени, па дури и до ММА и УФЦ арените – каде што веќе доминираат имиња со силна џиу-џицу основа.
Ако вака продолжи – Македонија многу скоро ќе има нов шампион за кој ќе зборува целиот свет.
