Утре, на 9 март, македонската заедница во Австралија повторно ќе покаже дека љубовта кон татковината, традицијата и културата живее и далеку од родната земја. Македонците од државата Викторија ќе земат учество на една од најголемите и најпознати мултикултурни манифестации во Австралија – Мумба парадата во Мелбурн.
Фестивалот Мумба се одржува секоја година во чест на Денот на трудот, а трае пет дена исполнети со културни настани, музика, уметност и забава. Круната на целиот фестивал е големата парада која ги собира заедниците од различни култури и народи што живеат во Австралија.
Историјата на фестивалот датира од 1951 година, кога Мелбурн ја одбележуваше педесетгодишнината од Федерацијата со голема парада и културна програма. Неколку години подоцна, по посетата на кралицата Елизабета II во 1954 година, градските власти ја увидоа огромната посетеност и интересот на граѓаните и решија овој настан да прерасне во традиција. Така, во 1955 година официјално беше основан Фестивалот Мумба, кој со текот на времето прерасна во еден од најзначајните културни фестивали во Австралија.
Парадата низ годините ги освои срцата на жителите на Мелбурн и до денес ја симболизира енергијата, радоста и мултикултурниот дух на овој голем град. Самото име „Мумба“, според абориџинската традиција, значи „Да се собереме и заедно да славиме“ – порака која совршено ја отсликува идејата на фестивалот.
За многубројните имигрантски заедници во Австралија, оваа парада претставува можност гордо да го покажат своето културно наследство преку традиционални носии, музика, танц и фолклор. Токму затоа и македонската заедница од Викторија оваа година одлучи да настапи обединето, испраќајќи силна порака за заедништво и љубов кон македонската култура.
На парадата ќе настапат седум македонски фолклорни културно-уметнички друштва, кои ќе дефилираат како едно – гордо претставувајќи ја Македонија, македонската песна, оро и традиција пред илјадници посетители.
Со звуците на македонската музика, разиграните чекори на фолклорот и богатите народни носии, Македонците во Мелбурн ќе покажат дека македонската култура е жива и силна, без разлика каде живее нашиот народ.
Парадата започнува во 10:45 часот, но организаторите препорачуваат посетителите да пристигнат барем еден час порано за да обезбедат добро место од кое ќе можат да ги проследат учесниците и да направат фотографии од оваа уникатна културна манифестација.
Овој настан е уште еден доказ дека Македонците, и кога се далеку од татковината, гордо го носат своето име, јазик и традиција и со достоинство ја претставуваат Македонија пред светот.
Македонија во срцето – каде и да сме! ❤️💛❤️
