Лидерот на ВМРО-ДПМНЕ, Христијан Мицкоски, по средбата со првиот човек на ДУИ, Али Ахмети, рече дека разговарале за Бугарија и за предвремени парламентарни избори.
Во однос на спорот со Бугарија, Мицкоски рече дека треба да се почитува резолуцијата усвоена од македонскиот парламентот од сите политички партии.
„Изразив загриженост поради фактот што колку повеќе ги напуштаме нашите преговарачки позиции, толку повеќе барањата од нашиот источен сосед се поголеми и на тој начин само се уништува преговарачката позиција и ништо не се добива за возврат. Јас лично и ВМРО-ДПМНЕ цениме дека треба да се напушти принципот на коленичење и сервилност, треба да се покаже карактер и да се вложиме максимално сите за да го покажеме тој карактер. Доста е од срамови и понижување. Народот е фрустриран“, рече Мицкоски.
Во врска со темата за предвремени парламентарни избори, Мицкоски смета дека е потребно тие да се одржат што побргу.
