Една одлука на властите во Приштина нема правна сила за Русија, објави руската амбасада во Србија по повод одлуката на Министерството за надворешни работи на Косово да протера двајца руски службеници.
„Одлуките на непризнатата држава Косово немаат правна сила“, изјави руската амбасада во Србија за агенцијата Тас, коментирајќи ја одлуката на косовските власти да прогласат двајца службеници на Руската канцеларија во Приштина за непожелни.
„Ние не ја признаваме независноста на Косово, затоа не ја признаваме нивната влада или други структури. Една одлука на Приштина нема правна сила за нас. Ние соработуваме со мисијата на УНМИК, вклучително и овие прашања, врз основа на резолуцијата на Советот за безбедност на ОН 1244“, се вели од руската амбасада.
