Најмалку две лица загинаа во експлозија во близина на џамија во Кабул, додека 32 лица се повредени, пренесуваат светските медиуми.
Целта на бомбата беше џамија во која се одржа комеморација за мајката на портпаролот на Талибанците, Забинула Муџахедин, и каде се собраа талибанските лидери, поточно претставници на Министерството за одбрана.
Засега никој не ја презеде одговорноста за нападот.
Раководството на италијанската болница во Кабул потврди дека примиле четворица пациенти кои биле повредени во експлозијата.
На лице место се голем број медицински тимови.
„Слушнав експлозија во близина на џамијата“, вели Авганистанец за АФП.
Тој додаде дека Талибанците набргу потоа го блокирале патот до џамијата.
Локалните медиуми објавија дека најверојатно размената на оган била помеѓу Талибанците и членови на ИСИС, а Ал Џезира наведува дека по експлозијата биле уапсени тројца мажи.
Билал Карими, заменик портпарол на Талибанците, изјави за Вашингтон пост дека експлозијата се случила пред портата на џамијата.
„Почнавме истрага за да го утврдиме бројот на жртвите од експлозијата и да откриеме кој стои зад овој напад“, рече Карими, нагласувајќи дека меѓу жртвите нема талибански борци, туку дека загинале цивили.
