Македонец во Австралија со 100 милиони долари ја подготвувал најголемата трговија со кокаин

Македонец во Австралија играл на покер апаратите во казиното „Стар“ во Сиднеј со огромна сума на пари кога им паднал во око на истражните органи. Тој за една недела преку покер апаратите „испрал“ над 100 милиони долари, а 18 месеци подоцна полицијата му стави лисици на рацете, објави телевизијата „9Њуз“.

Следењето на Македонецот од почетокот на 2020 година и неговата пасија за коцкање на милионски суми ја поттикнале полицијата во државата Нов Јужен Велс да истражи од каде потекнуваат овие пари и случајот водеше кон апсење на тројца мажи од Сиднеј кои се обвинети за криминален заговор за набавка на три тони кокаин, што е количество кое на годишно ниво цирукулира низ улиците на целата оваа држава.

Фармерите во Колумбија за оваа дрога добиваат два долари дневно. Картелите заработуваат 3,80 долари за грам, а кога ќе дојде до рацете на овој криминален синдикат кој ќе го дистрибуира низ улиците на Сиднеј, цената ќе достигне 400 долари за грам – соопшти заменикот командантот на полицијата во Нов Јужен Велс, Стјуард Смит.

Во текот на истрагата, детективите открија важен транснационален синдикат за организиран криминал, кој транспортирал дрога низ Австралија која пристигнувала преку канали од Северна и Јужна Америка.

Во акцијата, на полицијата во Нов Јужен Велс и помогна и американската ДЕА (Управа за борба со наркотици). Како што јави тамошната полицијата, морнарицата на САД запленила 870 килограми кокаин во октомври минатата година откако пресретнала брод кој патувал во Тихиот океан покрај брегот на Колумбија.

Разузнавачките информации воделе кон нова заплена на уште 900 килограми кокаин, во април годинава кога американските служби пресретнале втор брод кој патувал покрај брегот на Еквадор.

И двете големи заплени биле дел од заговор за снабдување на вкупно 3.000 кг кокаин – вклучувајќи ги и запленетите 1770 кг – што има вкупна проценета потенцијална улична вредност од 900 милиони долари, соопшти полицијата од Нов Јужен Велс.

Последното количество запленето во април е препакувано со лажна амбалажа и оставено да пристигне до својата крајна дестинација – складиште во областа кај езерото Маквари, на околу 150 километри од Сиднеј.

Токму во четвртокот, рано утрото 42-годишниот Македонец е уапсен од специјалните единици кога го отворил складот за да ја земе дрогата.

Полицијата од Нов Јужен Велс уапсила и маж на возраст од 37 години на паркинг во близина на складот.

42-годишниот Македонец од Мортдејл е обвинет по две точки за заговор за снабдување со забранета дрога, снабдување со големо количество дрога за комерцијална употреба како и учество во криминална група заради криминална активност.

37-годишниот маж од Рокдејл е обвинет исто така за големо комерцијално снабдување со дрога. И на двајцата локалниот суд во петокот им ја одби кауцијата и со тоа можноста да се бранат од слобода. Николао Миса бил директор на агенција за обезбедување Шилд Венју Сикјурити.

Набргу по апсењата, Одредот за организиран криминал реализираше пет налози за претрес во домови во Мортдејл, Падингтон, Парк Регенс, Рокдејл и Сан Соучи.

За време на претресите, истражителите лоцирале и заплениле готовина, електронски уреди, документација и бројни мобилни телефони, вклучително и разни шифрирани уреди.

Трет маж – на возраст од 58 години е уапсен на имотот на Санс Сучи и однесен во полициска станица и е обвинет по истите точки како и Македонецот, по што му е одбиена кауцијата, се вели во соопштението на полицијата во Нов Јужен Велс, која ја продолжува истрагата.

Двајца од тројцата уапсени работеле на Аеродромот во Сиднеј, додека третиот Ѓелош Николај во декември минатата година бил пуштен условно на слобода, откако бил во затвор од 2006 година заради дрога, осуден на 16-годишна казна.

Be the first to comment

Leave a Reply

Your email address will not be published.


*